Die moontlikheid van ’n burgeroorlog dreig as almal in die land nie saamstaan vir ’n beter toekoms nie.

“Daardie dag is nie baie vêr nie. Ons moet veg vir ons toekoms in Suid-Afrika.”

Só het Helen Zille, leier van die DA, Saterdag op die party se kongres in Polokwane gewaarsku.

Sy het gesê as die misbruik van mag voortduur, soos die polisie wat in die parlement ingestuur is, is dit die einde van die land se demokrasie.

Sy het gesê pres. Jacob Zuma bestry nie korrupsie soos hy sê hy doen nie. “Hy beveg diegene wat wél korrupsie bestry en dis al oor-en-oor bewys.”

Verskeie instellings, soos die Suid-Afrikaanse Inkomstediens (SAID), die Valke en die Nasionale Vervolgingsgesag ly hieronder. Hooggeplaastes soos Ivan Pillay van die SAID en lt.genl. Anwa Dramat van die Valke is daarom hul poste kwyt.

Zille het ook gewaarsku dat Telkom, wat alleenreg het om breëband-internet in die land te installeer, dieselfde pad as Eskom, Sanral en die Suid-Afrikaanse Lugdiens gaan loop.

“Korrupsie binne die ANC kan nie bestry word nie, want hul lede trek voordeel daaruit. Volg die geldspoor en jy sal die ANC kry. As ons toelaat dat korrupsie voortduur sal Suid-Afrika een van die armste lande ter wêreld word.”

Sy het gesê die EFF stuur af op ’n skouspelagtige ineenstorting. “Hulle verskeur mekaar. ’n Mens weet nie aldag of hul oorpakke rooi van kleur is of rooi van bloed nie.”

) Zille het ook die ANC skerp gekritiseer omdat hulle Vrydag met die opening van die Wes-Kaapse wetgewer presies dieselfde gedoen het as waarvoor hulle die EFF in die parlement veroordeel het.

ANC-lede het Zille se toespraak as premier ure lank ontwrig.

Sy het gesê die Wes-Kaapse ANC-leier Marius Fransman “en sy boewe (thugs) se poging was ’n goedkoop namaaksel van die EFF.”

“Al dink die ANC hulle het Vrydag gewen, is hul reeds swak beeld net verder verswak.”

26-02-2015 om 08:05 geschreven door Afrikaners against black racism