Ons is bewus van die feit dat die media soms net die storie vertel wat hulle pas. Daarom het ons besluit om Curro te nader om hulle storie in verband met die beweerde rassisme by hulle skool in
Roodeplaat met ons te deel. Na my mening het jou taal en/of jou keuse van taal vir onderrig niks met rassisme uit te waai nie en ons wil graag Curro ondersteun om Afrikaans in hulle skole te kan hou.
Curro se bemarkingsbestuurder het vir ons die volgende gestuur:

“Geagte Leeser

Curro het kennis geneem van die kommer wat u na die onlangse mediaberigte oor ’n beweerde voorval van rassesegregasie by ons skool in Roodeplaat uitgespreek het. Ons gebruik graag hierdie geleentheid om Curro se standpunt in hierdie verband uiteen te sit.

Klaskamersamestelling by Curro-skole:
• By Curro-skole word leerders tot en met graad 9 in afsonderlike Afrikaanse en Engelse klasse onderrig. Vanaf graad 10 tot 12 geld ’n dubbelmedium-onderrigbeleid. In sommige skole het ons ’n hoë persentasie wit leerders per klas tot in graad 9, maar dit is slegs as gevolg van die behoefte om sommige leerders in Afrikaans en ander in Engels te onderrig.
• Ons fokus hier is op aggregasie, eerder as segregasie. Indien u kind se moedertaal Afrikaans is, sal ons u kind tot aan die einde van hulle graad 9-jaar in Afrikaans onderrig; indien dit Engels is (of indien u wil hê dat u kind in Engels eerder as in Afrikaans onderrig moet word), geld dieselfde beginsel.
• Curro verdra of ondersteun nie enige vorm van rassesegregasie in sy skole nie. Ons filosofie was nog altyd en sal steeds bly om toeganklike onderwys aan alle Suid-Afrikaanse leerders uit alle agtergronde te verskaf.

Ons streef daarna om ’n waardestelsel te kweek wat kindvriendelikheid, positiewe dissipline, ’n Christelike etos en waardes, en kreatiewe denke bevorder.

Ons vertrou dit verklaar die breër konteks. Sover dit die insident by Curro Roodeplaat aangaan, beklemtoon ons graag dat daar op geen stadium ’n uitsluitlik wit graad R-klas by Curro Roodeplaat was nie.

Die pad vorentoe:
• Planne is in plek om spesifieke bekommernisse te hanteer wat by Curro Roodeplaat geopper is. Een ouerverteenwoordiger per klas, soos verkies deur en uit die ouerliggaam, sal in die toekoms by leerders se klastoewysing betrokke wees.
• ’n Versoek om onderrig in ’n swart addisionele taal, in plaas van Engels/Afrikaans, word ook ondersoek. Dit is ’n groter uitdaging, veral in Gauteng, waar ons moet verseker dat die gekose taal die behoeftes weerspieël van die gemeenskap wat deur die skool bedien word. Ons sal u op hoogte hou van ons vordering ten opsigte van hierdie versoek.
• Ons is buitegewoon ernstig oor ons verbintenis tot die toekoms van ons leerders, en wil hulle blootstelling aan enige onbillike praktyke beperk. Indien ouers in die toekoms enige bekommernisse oor enige vorm van beweerde diskriminerende praktyke by enige van ons skole het, kan hulle ’n e-pos direk aan die Curro Holdings-hoofkantoor stuur. ’n Toegewyde e-posadres sal vir hierdie doel beskikbaar gestel word. Meer inligting oor die spesifieke kontakbesonderhede sal binne die volgende week verskaf word.

Ons herhaal dat, soos alle ouers en voogde vroeër hierdie week ingelig is, in ooreenstemming met ons missie om gehalte-onderrig aan u kinders te verskaf, sal Curro nie enige vorm van diskriminasie verdra of ondersteun nie.

Dankie vir u ondersteuning.”