Dag allemaele,

Jergisteren zin we naar khao lak deuregereist. In den achternoene wa utgerust ep het strand. We hadden lik direct deure da dat lik minder oes dink es. Veel te veel toeristen. Allemaele van die oranje gerwoasterde westerlingen die gjille daegen viss liggen te kikken ep ulder nen handdoek... wa een contrast met de lokale warme goedlachse cultuur waar da we afgelopen weken in vertoefden...
Gisteren zin we ton ep dagtrip gewest met als doel te gaan snorkelen. Ok twas wok wel een echte toeristische attractie voer westerlingen, maar we kwamen voe te snorkelen en da viel stif goe mee. Ismene was er direct mee weg en Lysander kon met het kijkkerke dat ie van nonkel kevin gekregen ad wok af en toe nen vis spotten.
Ep het ende van den dag hadden we allemaele nog wa mjer kleur gekregen en sloten we den dag of met nen gigrilden inktvis en nen pizza voe de kiendjes omdat ze brave waren geweest 😏

Vandaege em we deuregereisd naar krabi, met de lokalen otobus. Den dien zette oes of an een statie verre ut het centrum van waar damme wilden zin, an een kotteke da gemakt was voe naieve toeristen ep te lichten.
Jin of anderen thaisn aap wilde oes daar perse in jin of ander resort voe veel geld aan het strand steken. Min madam gaf nie of met als gevolg dat ze eur buzze pakte en zei "kben ier weg" (en ik moeste ton igenlik wok maar volgen)

200m vwoader zin we ton in nen lokalen taxi gesprongen, en dien eit oes ton afgezet in het centrum van krabi, weg van de stranden waar dat er veel te veel witte toeristen zitten. Achteraf gezien stif goe ingeschat van minne reisleider,
want we zitten nu voer de helft van de pris in een echt skwoon hottelleke.

Vanachternoene hadden we niks gepland. We gingen een toerke gaan wandelen en achter 300m zin we al nen lokalen bwoat ep gesprongen die met oes een toerke eit gedaan deur mangroves (waar damme toch een stif grote slange ein gezien) en oes ton eit afgezeten aan een drivend restorang,
waar da ze verszekerst 50 sorten aan zjeebeesten met een skulpe hadden...    mmmmmm.... (we gaan were de kakkerie ein)

Ton ein we toch nog een beetje gewandeld deur het stadje. Ale gewandeld keun je het wok nie echt noemen. Tis ier voe de moment nieuwjare (song kran) en iederjin es in fjiststemminge. En in de plekke van ulder sjiek ep te zetten en voe veel te veel geld te gaan eten... doen ze ier ulder versleten kleren
an, zetten ze een mege kuppe met water ep ulder zulle (of ze zetten die kuppe in de kofer van ulder nen pickup) en ton smitten ze ep iederjin dan passeert een seule water. We ein begunnen met van ep afstand te kikken, maar achter twee straten waren de kiendjes al zuppe nat.
Ton maar meegedaan en met de lokalen pinten gedronken ep de zulle en met water gespeeld. Ze geloven blikbaar oe meer water daje met nieuwjaere over u kreeg oe mjeer sjanse daje gaat ein... Lysander stand zat ep den deur gewoon in een kuppe, dus twordt een goe jaar voer em...

Nu gaan slapen met ep den achtergrond de beats van fjistende songkranners, ma nie erg want we zin moe genoeg voe daar deure te slapn.

Slapwel.