Dag allemaele,

We zin widder nu al een paar dagen in Cambodja en da volt ier ongelwooflik goe mee. Ep gastronomisch vlak es da ie gelik een grwot foodtruckfestival. Ge kund ier ep iederen hoek wel iets eten of drinken en da zonder daje geruïneerd zit. Ent riekt wok allemaole zjou goe. Gelik waar daje gaat riekt wel ieverst jin dat aan het barbecueën is en der juste veel garage kruiden et ep gesmeten. Kweet wel nie of ze dat ier wok garage kruiden noemen, want een garage dat ein ze niet. Zelfs een hus es wok nie altid. Toch nie hetgene wa da me winder onder een hus verstaen. De mjiste platskes ep het platteland waar da de minsen slapen zin eigenlijk 6 palen met daarond een golfplaete genageld. Ton hangen ze daaer 3 hangmatten in en zetten ze nen barbeque epulder nen eprit... eigenlijk nen open keuken gelik oe da me widder da zeggen.

We ein wok nie den indruk da ze ier vele werken. De mjiste minsen zitten eigenlijk gewone vele niet te doen langs de kant onder nen bwoom. Ge zjou voe minder welgezind zinne... want echt waar ze lachen altid an ze naar jun kijken.

Vandaege em we naar goeie traditie wa tempels bezocht. Magnifiek. We voelden oes echt gelik kuifke. Tes ier echt nig stif authentiek.  De tempelsliggen te midden de jungle. Ge hoort vanalles van geluiden uit het bos komen. In de tempels zelve es ter mjistal een wandelroutje voorzien, maar voe de rest ein der ier precies nog nie veel archeologen gepasseert. Der es nog niks epgegraven en ze laten eigenlijk het bos dat er overgegroeid es gewone staan. En tis juste dat daje nievers elders et dat het zulk nen speciale nindruk geeft. Noemt het kuifke of indian jones... maar echt vrij uniek om ier te keunen deure wandelen.

Morgen gaan we nog mjer het platteland deure en oeze gids ging een tochtje ep een karre met nen buffel deur de ristvelden voorzien. We zin benieuwd.

Tut laeter

Gr bjorn en co