Dag allemale

Achter 2 weekn begunnek ze een bètje te verstaan. Kzegge wel een bètje, want in veel zaakn blufnt kweeties . Om den jin of anderen reden zittn die Japn altid liever ep ulder knieën dan in nen zetel. Ze sjoen da ne kjer moetn onderzokn maer ik peise dan ze zulder gin stèrtebjen ein of ton toch een gjel korstje. Ik ei al gepeist van ’s avonds gelik de coureurs  een buststek in min onderbrok te steekn , moja da kost ier nogal veel geld... Langs den anderen kant moek ton wok wel weere toegeven da ze veel betere salontafels ein dan bie oes. Omdat jun knieën gin koud sjoen ein hangt ter lijk een sarse rond die salontafels en zit er an den onderkant een verwarminge , zwodanig dat junne onderkant zwjet en da jun hoofd lekker koele bluft. Eigenlijk peiske kik dat Arsène weba dringend ne kier naar Japan moe komen. Der ligt oer nog ne gjeln markt voe zetels te verkoopn en mocht ie de salontafels in Deinze in de sjowroom zet… tzin ier zaakn te doen.

Dat het rare kwietn zin blijkt wok ut het feit da ze altid te passe en ten onpasse ulder skoen of doen. We ein daar in een doeninge geslaapn waar dat er een keun rondliept. Intussen ein we al deure da je  bie het binnengaan altid jun skoen in de kasse moet zetn en ip jun kousn of blwoate voeten in hus moe loopn , zodanig da je ulder nen vloer niet sjoe vul maakn . Loope kik daar gin drie passen en staak biekan nie in nen koninnekadul. Da keun mag gjel het hus vul kakkn en ik moete daar met min blwoate voeten deure loopn, omdat min skoen anders den vloer sjoen vul maakn….? (tussendeure: aje naar Japan komt pakt beter skoen mee zonder rikwoarden – zelfs voe naar de wc te gaan moeje speciale sletsen aan doen, waarschijnlijk voe tgaval da je ep jun blwoate voeten sjoe peins en ton daarmee weer mee in de lieving sjoe loopn… )

Kmoete nu wel toegeven da sommige van ulder utvindingen wel gemakkelijk zin. De wc waarover dak al verteld et. Ewel kbegunne mie et lik weer al te ontzien om ep een gewoon standaardmodel gelik da we wulder in België kennen te moetn gaan. Tus toch een beetje gelik met nen auto. Vele van de opties ep nen nauto peisdje eigenlijk da je niet nodig et , maar aje ze ne kjer eit gebrult je ze: Automatische spoelinge, zetelverwarminge, bizonale reiniging, een muzikske met watergeludjes voer at niet vanzelve komt…

Wa da ze ier wel goe kunn is kookn. Van de raarste dingen maakn zie ier (meestal) iets goe en wok iets gjel anders dan damme wilder da gereed doen. Vanavond gekarameliseerden makreel gegeten. Kzoe nie weten oe da ze da ein gereed gedaan maar ’t was lekker. Gisteren iets gelijkaardigs met sprinkhanen , aje der nie bie peist,  smaakte da eigenlik wel. Jergistern oesters gegeten. Man wulder kun daar nog wa van leern : gegratineerd in een pallulle, gefrituurd in een krokette, ingevroozn in iscrèm, geroosterd ep den barbecue en allemaol echt wel lekker…

Vandaage verbleven we in de Japanse Alpen. De reisgids had een wandelinge utgestiépeld van 8km zonder buggy. Twas echt skoone. Gelik nen gjeln anderen kant vant beeld da we tut nog toe aan van Japan. We komen stillekes aan achter de drukte van de steden die we ein gedaan tot rust en we ontdekken wok nog het meer authentieke platteland. Kiedjes ein stif ulder beste gedaan en misschien erin ze toch nog een beetje genen geërfd van opa Pierre of Oma Nikki. Ze amuseern ulder nog alletwee, maar begunnen  toch af en toe ne kjer naar hus te vraegen. Ismene wil met de kaartjes spelen met oma niki en Lysander wil vooral rappe fietsen.

Andermaal is minne sake verre ut.