|
Rebonchours (kben te kik ier were)
Kbegunne meer en meer gewend te geraken aan die Japn. Maar
over de gehele linne gezien bluvn het toch rare kwietn. Ze ein van die kantjes
waarvan da je peist dan ze soms toch een betje te lange boven de wierrook ein
gehangen. Vandaag eik onder min voeten gekregen omdak vwoorn den uitgang van
een restorang stonde te wachten, goe wetende dat der niemans in da restorang
zat en dat de deuren van den ingank 5 meter vwoader was
Eigenlijk ein ze ier wel veel van die otistische trekskes.
Het moet allemalle stif volgens ulder regelkes zin: in den groen autobus moeje
vanachtens drep en betalen bie het afstapn, bie den oranjen just omgekjerd. Ze kik
ton naar u gelik af daj een dom kanard zit dat niet vertstaed. Eigenlijk zi je Glen
dag aant peisn of da je het wel juste doet.
Een andere uitdaginge es ier naar twc gaen. Ge weet nooit
vworn da je de deuren open doet wulk een exemplaar da je gaat tegen komen. Van
een Frans gengre tut jén met mjer opties en knopn dan da ne peugeot èt. Gistern
moeste kik eindelijk ne kjer de grote behoefte doen (achter ol dienen rist
bluft da soms wa langer zitn. ) Zat kik nie
ep nen wc met 46 knopn
Kvonde de sjasse nie! Ik heb daar ep vanallos geduwd.
Min gat eit nog nooit swoa skoone afgespoeld gewist, zelfs minne dik darm eit
ol den binnenkant een spoelingske gekregn. Ton zage kik eindelijk den knop
waarvan dak peide, da moe de sjasse zin
Kduwde daar ep en der ging een sirene
af... Een minute daerachter kwam ter nen Jap afgelopen en klopte ze ip min deuren:
you ok sir? - intussen wast allemoale
ok, want in minne paniek oak kik ep alles geduwd en oak de sjassse gevondn
Van
afgank gesproken
.
Eigenlik est biekan niet te geloven oe hygiënisch da ze ier
zin. Neffest den urinoir angst der ier wok een dink om met jun dink tegen te
gaan staan. Achter dat gjel gespoeld en gedroogd es kundje une brok were an
doen. Ke der nen foto van gepakt. Zie ierboovn. Wok naar den douche gaen es ier
niet simpel. Tes dus een gezamenlijke mannen badkamer en iederjen eeft een btje
zin ritueel voer em te wasn: jist moeje u afspoeln. Ton in mega warm sop gaen zitting
met neen natn epgerolden handdok ep uw oofd tut da je een tomatte zit. Ton
moeje van een sorte sjippe ep diene handdok doen en der zekerst 10 minuten mee
ep jun lif frottn. Ton jun were afspoelen en da zelfde ritueel herhalen voer
jun haar te wassen en voer junne baard te skeirn. Kbenne nog nooit swoa proper
gewist.
Ma goed, we ein wok wel al vele gezien en afgestjoold. Vandaag
naar Nara gewist. Een stadje met veel tempels (echt wel skoone) en int stad liepn
der wok overal ertjes rond. Voer een paar yen kondje wat koekskes kwoapn en ton
kwamen ze ut uwn and eten. De kindjes vonden da wel tof. Lysander was zelf wa overmoedig
en ton da ie een ertje zaagt een dooze pralines van een etalage van een kraam
tjoepen vond ie dat ie moest eptreden en die doze were gaan afpakn. Die erte
was niet akkoord en eeft em een duwke met zinne kop gegeven. Voadre had evenveel
verschootn lik de zeune. Sjanse t was nix ergs aljinne ne veule frak.
Gisteren zimme in een bamboebos gaan wandeln. Wok stift
skoone, maer der waren veel te vele Japn waardeure dat het gjel vele van zin
sjarme verloor. In den nachternoene neen berg omooge geklomn voe naar aapkes te
gaan kikken. Kindjes vonden de aapjes skoone, widre vooral het uitzicht over de
bergen en het dal met daarin Kyoto.
Tijd voer in bedde te krupn.
Tut later
Gr
Bjorn en co
|
