Gistern ek lat us zegn e ongewone kerst at. Wen namelijk nat strand gewist, pintjes verzet en gedanst opt strand. Kortweg, twa lik e festival :) keirart schiek ajet mi vraagt :D 's avonds waarn we ook ollemale in forme en ja, vant een kommet ander enni... tzei ommke één: ei, gam e drankspelletje speeln? ... oe kuje da aanbod weerstaan?... dus ja... twa ol vree schiek tot vanunchtnt...
Hello sunshine!
das normaal me favourite zinnetje dak zegn tegn iedereen akke opstaan, ewe nie vandage. Miljaar.... vandaag is me eerste kater dag in aussieland. Miljaar... ke voeln me lik e scampi die veel te lange in de panne gelegen et... (of oe dat ook meugt voeln... ti slicht!)
Mijn goeie vriend meneer de kabouter met zijn hamer, ja... ne zat in me hoofd en deze keer wastn nie alene tegen me oogballen ant slaan, maar e was heel de binnekant van me scheleltje aant bewerkn... pfff... (en e wist van geen ophouden, if you know what I mean...)
man man... da gevoel ku nie rappe genoeg over zijn... en dankzij mama's voorzorg om e hele apotekerie in mijn meuzel te steken en de doze motilium te attakeren peisdek va rappe genezen te zijn... ewe... 2 motiliumtjes later... (je ku noois genoeg van die dingen pakken at over je mage gaat...:) )mmm... da maakte toch gn verschil uit pfff.
Ke loopn nan zetel om voor nuzn mega grootn TV te zitn en het eerste dak zie is de paus die binnenlopt in ze messe. Hehe e nis lik de Lady Gaga onder de pasters :) net ook zuk e raarn hoed an e me ze lank kleed... en ne zwaait me zijn handtje met e smile op ze kop... man man... ne lopt daar met het glamourgehalte van madonna... kom slicht van zukke schijnheilige mensn... en over slicht gesproken... momentje...
aaaaaaaahhhhhh voila, het ijs is gebroken... da was mijn eerste braksje van de dag. Da ku toch deugd doen! Ke wel moetn rappe doen... shittt... ka bijna de badkamer gemist... Ke vo mezlfn beslootn dak wijselijk int appartement ga blijven vandage en in me bedde ga blijvn. En jawel... het beste van al: kent appartement vo mezelfn :)
en aje je nu moeste afvragn waarom dak ier in godsname over spugn schrijvn... jah... vele mensn e soms eki tzelfde probleem hier, en ja om het 'taboe' hehe te verbreken rond da topic hehe NOT... ke voeln me geweune vol inspiratie en ke moestn da nere schrijvn enni.. ti eki etwot anders dan overt landschap, de mensn, het moet nie altijd hetzelfde zijn enni... ;)
voila... 3 uur later en nog even slicht(er) en nog e spuugsje later ke zijn bika zeker da alles na me hoofd gepompt wordt enni want ier down under,... pfff ti misschien omdak onderste boven hang op de wereld dat da ol uitwerkt op je hoofd... ken ondertussn nog 4 motiliiums gepakt en lat us zegn dak me nog beter gevoeld e... ooowww
wow... deze ki ek de badkamer gemist... lang leve de lavabo!!! ondertusn zitke int stadium da het 'landschap' geel is... man man... das doodgaan!!! ma ok, ke ga probeern iets te eetn ol ek geen honger... 2 beschuitjes met gelei... mmmm freezn...
voila de anderen zijn bijna were en ke ga e douche pakn... het kan zijn damme e barbie doen met die mens die da huis ier heeft... pfff ke gn honger lat staan dak iets kun riekn va drank...
shiitt... ke ging na de douche en ke zelfs mo e glimp gezien van de wc pot.... en jap... ikke versus de wc... de wc heeft gewonnen.... man man... me mage e vele weg van e nechte dancing queen... ondertusn ek het motilium dieet opgegevn...
nu zim were nunchtnt en je raad noois wuk dam 's avonds nog gedaan en.... :) jawel ik met me crapuul van e mage op stap deur melbourne. Die mens wou ons per sé de clubs van melbourne laatn zien. Pfff ke peisde dak overal ter plekke koste spugn... ma da ek nie gedaan... ken mega schieke dingen gezien, de meeste clubs zijn op de onverwachtste plekn, ze maakn der e sport va om nunder clubs te verduiken en op de meest rare plekn moeie ze gaan zoeken.
Ezo zim vanboovn op e appartementgebouw beland... schiek wi :) e schiek zicht, goein muziek en de mensn zin zo raar gekleed... iedereen et zijn eigen stijl... en je meugt je rare dingen voorsteln wi... lik ken e cruella de vil gezien... ja ja!!! met alles derop en deraan... zelfs het haar ;)
en we zijn eindigd in e club waar er e live Jazz bandje ant speeln was. Mo vint... da was het beste staaltje jazz dak in me levn al oort en... blijkbaar treden er hier massas kleine bandjes op en overal, op ieder hoeksje van de strate, in iedere club, ze zijn ossa ant speeln... man man...
achter e goei danspasje (want je koste echt nie stille staan op die muziek... veeeeel te goed!!!!) en e paar cola's later voelde ke me were beter... ke wilde nie naar huis zolange da dat bandje ant speeln was... twa echt zooo goed... jazz met e extreem hoog rock and roll gehalte... man man... de gastn ier beslootn om pizza te bestellen... en ke me aan e stuksje of 2 gewaagd en jawel!!! genezen!!! :D
je ku nu zegn... ja aje zo ziek ziet gaje toch nie uit?... ewe das waar... mo ke zou anders ook gn an-sofie noemn enni ;) kmoetn wel zegn dak immens afgezien e... shitt... en wat hebben vandaag geleerd? Mingelt noois gn tequila en whisky!!!!
Nieuwjaar en kerstdag komt eraan, en jawel iedereen is em ant voorbereiden, wel ikke ook. Ondertusn hebbn we port Lincoln achter ons gelaatn en zim op weg naar Adelaide. We gaan daar verzekers e weke of zo bluvn, ti te zien oe dat gaat met de painting business :)
voort moment kuk nie klaagn, ku kun altijd schilderijen verkopen. Man man... je zou het soms eki moetn oorn... junder zou lachn... at er nu één is die er de cocosnoten va kent, ist ikke wel :) mo geloof me, ti lik echt :D
ken ezo moetn uitlegn oe dak da sommige werkn gemaakt e, bijvoorbeeld der zitn der tusn met sylicone het zijn dansende balerinas :), ke zegn ossa dat sylicone is daze gebruikn in operatiezalen :D bahahahaaaa je zou ze eki moetn zien kikn... hele verwonderd, voeln an da schilderij, en ton zegke der altijd bij: look madam, you can still see that the painting is fresh, you can touch it, you can smell it, you can feel it, you almost can taste it! :) en ki vo keer staan ze te knikken lik ofdak het evangelie zit voor te lezen. Man man...
de clou is om heel zelfverzekerd over te komen, wetn wuk daje verkoopt, en ja wij noemen het: kunnen bullshitten :)
één ki et er e vent gevraagd, ma waar haal je gie in godsnaam sylicone daze gebruiken in operaties?t'enige dak koste bepeisn was: it's all about connections sir....( ke peisde shit he, deen ziet da ier dak ant zevern zin he... miljaar e nu???....) ke keekn na dien vent, kprobeerde nie uit me rolle te valn en ke toverde e smile op me aanzichte met knipperende ogen.... en ne geloofde het helemaal :) kwa verzekers lik e schaap ant kikn :) hehe
jah, ondertusn zitke in de auto, onze rode caminete. Ken nog het caminetje nie beschreven, grote zonde.. ewe, ti dus rood, verschrikkelijk oud, de kabels hangen uit de dashbord, de deuren mag je nie te hard toe slaan anders krig je ze nimi open, at er bubbels zijn op de route, oor je het hele hebben en houden (vooral het ijzerwerk aan de onderkant) kraken en piepn, der zijn 3 surfplankn opt dak (en 1 vanbinnen...), er hangt 1 achteruitkijkspiegel hele scheef (kdurf er nie aankomen omdak peis dat ie gaat afvallen...), aan de binnekant van de auto is er e 2de verdiep geconstrueerd.... kortweg e roos net en daar hangt tuig in... (nie zo ideaal ajet mi vraagt... vooral aje wit dat elastisch is, dat er soms eki bubbels zijn in de route en heel het net met alles erin tegen de bovenkant van je kop slaat...
kun ezo zegn dat nuzn gitaar ol vele gespeeld et hier in de auto... alene niet met de snaren maar met de volle kast lik e drum op min hoofd... :) Viva la musique!
das int kort wuk da nuze fameuze rolls rolce is. Mo we zin der allemale zot va! Ti over e half jaar e brokke antiek! :D ma trijd nog lik mercides :) wuk moem nog meer en? ...
ondertusn ek e vree rare uitslag op me vel... het zijn massas bubbels (mo echt overal op me vel) en ja... het jeukt dat gin name et, mo akke der ook mo peisn om aan te kom, ist lik ofda me vel in brand staat... met andere woorden, bezigheid alom! :)
en lik ofdaze zegn, wat komt, verdwijnt ook were... ewe, das wuk dat er gebeurd me met rash... :) tis weg! En ondertusn zijn we in Victor Harbor, de latste stop voor melbourne, nie vele speciaals, mo nice om te surfen!
Jawel, kheb mijn eigen surf gerief gekocht!!! da houdt in e wetsuit en e board :) ke zin nu lik e nechtn :) er is hier één beach waar damme kun surfen, en ja, aje moe kijken naar anderen of met e bobyboard (een verkorte surfplanke) moet rond peddeln, jah... das saai, daarmee dak me e board aangeschaf e :)
het surfen... ja da is inderdaad zo schiek lik ofdaze ollemale zegn, alene... ti verdomme lastig! Pfff de zee hier waar damme kun surfen is bijzonder wild, (vooral de laatste dagen ist hier niet te proper weer...) dus da heeft effect op het water, ewe, kun je zegn, ti de moeite. Der zijn golven van lik 4 à 5 meter hoog. Dus ikke als beginnende surfer, je zou het moeten zien... (weten dak nie de eleganste zwaan ben...) man man...
het peddelen alleen ol is e kunste :) ikke versus de golvn :) en int begin moei ebitje je planke kun aanvoelen vooral tegen de golven (da gevoel miste ik...) dus ging ik meerdere keren ondersteboven, top over kl*ten, achterstevoorn, met 3 liter water in mijn mond/maag int water, tegen de vlakte, het zand. Jawel, twa lastig... maar lik ofda mijn leuze is: no balls, no glory he...
maar weten dat ik graag voor ieder 'lastig' probleem e oplossing zoek, heb ik één gevonden, namelijk: in plaats van de peddelen, loop ik tot zover het gaat. :D Zelfs dit is gevaarlijk, vooral als je denkt slim te zijn en je plank voor je te houden terwijl er golven afkomen... ne nee... achter e keer of 3 mijn board tegen mijn voorhoofd te laten spoelen en peisn daje voorhoofd dezelfde grootte et van da van frankenstein's voorhevel (laat staan het gevoel...), weet ke daje de planke het beste laat achter komen... ;)
ewe achter e paar dagen, welgeteld 2 :), kostek rechte staan!!!! (dit voor miss 3 sec, mo ke stond rechte!!!) maar het bluft moeilijk! Ofwel miske de golf, ke ga ofwel nie rappe genoeg, ke sliern ol de andere kant va me board were of, akke wiln rechte staan bluft me voet steekn, akke me wiln rechte duwn gletsnke uit en volke op mijn aangezichte (ak sjase e int water, anders op de planke :) ) dusja, ti ossa etwod! :D
en ze blijven hier maar zegn en volhouden dat zeewater enorm gezond is... wel tis misschie juist voort vel en vo je haar maar voor de binnenkant vant menselijk gestel kant nie vree goed zijn... (jawel, kweet waarover ik spreek... :o... ) door al mijn enthousiasme, golvenpret en steeds te roepen BIG WAVE!!!, krijg ik namelijk meer zeewater te verwerken (in de binnenkant) dan de gemiddelde surfers... shiiiit.... 's avonds wast e heel avontuur op de wcpot (vooral om het zo onopgemerkt mogelijk te houden...).... miljaar... sindsdien roepke nimi big wave, maar nu houd ik wijselijk me mond (en toe) en duik onder de golf... jawel een ezel zal geen 2 keer op de pot zitten en wensen dat er zoiet lik e kurke daje in 'je wit wel waar' ku steekn bestaat...
tot zover mijn beschaamd/intiem gedeelte over het surfen...
aan iedereen e zalig kerstfeest en e gelukkig en spetterend (hopelijk nie lik hierboven ;) ) nieuwjaar!!!! en hopelijk mag het rap ebitje verwarmen vo gieder! Bahahaaaa man man... is da toch geestig hier in de warmte, aant zeetje, schoon volk,... (sorry maar kon het echt nie laten...;P) ma gieder zit rond de kerstboom, voor mij geen kerstgevoel dit jaar, ookal doen ze hier krampachtig nunder best om het zooo kerst mogelijk te laten uitzien door bijvoorbeeld nunder otto's te versieren in rendieren :D, huizen lik in de filmtjes te decoreren met muzieksjes en luchtjes (waarvan daje soms zou peisn daje in e lunapark terechte komt en je pudonozel komt van da gepiep..), enz... man man... ze zien ier stapel zot va christmas! Nie normaal, mo wel charmant :)
om nu nie melig te doen, kga toch wel iet heel bijzonders missn dit jaar... man man... ken der al e hele weke an gepeist en kom zot ak der meer an peisn.... je ku nu peisn, mmm... anne mist:
eur peerd,
eur familie,
scampi
neur maatn,
de kerstboom
bier, jenever,...
ewe... PEEEUUUUUTTT
het gene dak het meeste ga misn is namelijk het kersteten. Miljaar... (en ook ebitje de reste wi, vooral het laatste dan ;) bahahaaa graptje! )
nu ja, door al die mooie gedachten is het weer overstroming in mijn mond dus...(en ik wil dit niet verder laten uitbreiden met alle vuile details tot gevolg...) tot zover deze lezing!
oe ist ginder nog? Hehe is me blog nie te saai om te leezn? Je moet junder nie laatn om 'feedback' (shit ik haatn da woord :) ) te geevn... dus ja... lat junder mo gaan...
dus ja, ondertusn benke van west naar oost gereden... naar Port Lincoln. ke mijn eerste ervaring met het links rijden met het stuur an de verkeerde kant... in het begun wast wel ebitje raar en kluchtig... ke reedn vaneiges eerst rechts en zegt alex, no no no, you ave toe ride on thi otherrr shide ( probeer het het lezen lik ofdat staat, ti zin accent...) e nis ebitje lik borat eigenlijk... mo achter e eindje ist wel ok wi :) ke doen da nog geern :) en...
me portie a geluk stopt mo nie... deze mensen e me aangeboden om e jobtje te doen... namelijk artiest zijn :) ja... da houdt in, schilderijen verkopen. Gistern ek me eerstn dag at en wen ol tamelijk veel verkocht op 1 dag... dus ja :) ti wel schiek... en ti oltijd cool om extra geld int laadje te brengn he... :)
over veel geluk gesprookn... in austraalie eze nie ossa terremak wegen, dus we zijn ant rijden op e gravelweggetje en dien israelier is ant rien, allene, ne rijdt ongeloofelijk rap, en nis nog eki ant filmen met zijn kodak uit het venster. Ik zitn ook van voor en ke zien ol e heel tafereel vor me damme begun sliern, en ja... geweun e groot accident. Dus ke zegn tegn dien alex, ke peisn daje te rappe rijdt... het is hier geen vaste bane... en je rijd nog eki me met 1 hand... dus ja... MO zeg nooit tegen e vent datn te rappe rijdt..... shiit.... al datn zei was: yes yes. Dus achter e klein km, begunt wel ommeki de controle van auto te verliezn... we begun te sliern, links, recht, en e volle 360.
het cammionetje stond nog recht, helaas schuin in de diekkant. (sjase dat ze hier geen beekn hebn...)
ke spring uit dien auto, en der was niet an... ongeloofelijk... me grotste zorg was de banden... we hadden juist e band moetn vervangn en we hadn geen reservers nie meer dusja... int gat van pluto, gn bereik met tel... de dingn adn wel eki serieus mis kun loopn... mo ke zegnt... me pot vol geluk is groot lik ofdamn zegn... :)
dus, no worries mate :)
en lik ofdat alles op min afkomt... de eerste dag dak alene e moetn verkoopn aze me gezeit, ja anne, verwacht er nie tevele va. A je één ku verkopn, da gaat ol goed zien. E ja, ikke doe me ronde, en opt einde van de avond akke der jawel: 6 verkocht :) hehe ze waarn ebitje gechoqueerd omdat goed wa, mo ke weetn dat ezo nie olle dage ku zin. Nu, uze schilderijn brengn nus bi de meest verschilnde mensen. Dien alex at e schilderij of 2 verkocht an e vent en e madam. En we moestn na daar gaan achter de ronde om gewoon wijn te gaan drinkn.
We komn daar toe en kzweer het je, da huis is groter in oppervlakte dan de kerk in krombeke. De mensn die nus ontvingen, jah bere sympathiek en ja ook wel ebitje dronke :) hehe twa wel kluchtig :) nu achter ebitje klapn en doen over kunst, begunt de echte gesprekn jawel, met e paar flesjn wijn ( e wuffern wijn). E ke vraagn tegn dien vent (Ian) wuk datn doet vo job want kzweer et, de dingen die in het huis staan, da was uniek wi... lik bijvoorbeeld e vleugel piano uit de oorlog, kunst die 100 000 dollar weerd is....
e zegn: ' oo, I was producer of several big artists like elton John.' ke wistn nie wuk dak oorde. Ke peisde datn ant zevern was en ke geevn em e elleboge lik va, jaja gie kluchtigaard... en zegtn: kom mo na me entertainment room, ke gaat je toogn. En inderdaad, ne toogt e paar platn en ze name staat erop...
ze vrouwe is dé topchef van australie. Blijkbaar koste da madamtje keiart goed kookn en aze e paar sterrerestaurants at en ol... man man... mo aje da koppel ging zien, ja je ging peisn dat geweune dronkaars waarn. Blijkbaar aze nus stief geern e muchtn we de dag erachter were gaan, geweune vo wijn te drinken en muziek te beluistern.
Vaneiges emme da gedaan... twa keiart schiek enni :) ke uniek beeld en muziek concertn gezien op video, va lange lange geleen... van artiestn bijvoorbeeld lik: Carol King (de deze kendek nie, mo twa nog redelijk ;) ), Bruce Springsteen, en ene Roy orbensen, queen, abba, david bowie,...
bistn damme pool ant speeln waarn mochtn we keiart diere cigaarn smoorn... daarvo ekke vriendelijk bedankt gezeit... want ke weetn de gevolgn daarva :D... en ja, Ian en Suzie gaavn e feeste de dag erachter en ze stonden erop damme ging komn.
Zogezegd zo gedaan... we komen daar toe, we krijgen daar het beste eten, en de gasten, wel lat us zegn dak de jongste was :) de anderen waarn ol politiekers, burgemeesters, en bla bla mensen. Lat us één ding duidelijk maakn... austraalie is qua mode immens achterlijk... ze droegen de belachelijkste jassjes, de gekste kleuren, kortweg alles die NIET tope past. En int begint waren de mensen immens chiqué... en iedereen wit dak daar nie zot va zien van ol da 'hautain' gedoe... dus met andere woordn, zik geweune mezelfn want ke zin ik daar wel gerust in :)
onder tussen ekke met e madamtje begun klapn over peern, zij had nog western gereedn en ol...en zegt ze: der is ier nog etwie met lik 15 peerdn tus, kik ti da madamtje, ke ga ze voornsteln a gie. Achter ebitje klapn, (da madamtje was bere sympathiek) zegt ze: komt gie mornt na mi thus, we gaan wij e toertje doen en erachter e barbie. (das het korte woord vo barbeque, kluchtig enni ;) )
het was ondertussn zondag en jawel, mijn zondaagse traditie werd in eer gehouden... ken e toertje gedaan te peerd, de eerste keer in 2 maand dak op e peerd zit. Het paard was wat western geleerd, ti e heel andere ervaring. Ooo, en het schiekste van ol was, amme ant galoppern waarn op de strate (jap, ze houden daar geen rekening met niets :) ) roept Kathy: watch out for kangoroos! Ik e me slecht gehoor... jah... kat nie verstaan... ke peisde daze zei damme trager moestn gaan of zo... en ommeki springt er e kango uit de boesjes. :) ti were eki etwot anders :) en achter e avond vol gezelligheid met andere maten van suzi en Ian waarn we allemaal voldaan en content... 2 dagn later gaan we verder richting Adelaide!
