Faraidhean maoraich gan ìsleachadh
- Air fhoillseachadh
Chuir Cal Mac na faraidhean an-àirde o chionn ghoirid.
Thèid cur às do na faraidhean mòra a th' air bhanaichean maoraich air aiseagan Chaolas na Hearadh is Chaolas Bharraigh.
Chaidh na prìsean suas a chòig uimhir bho chionn ghoirid nuair a thuirt Caledonian Mac a' Bhriuthainn gum biodh iad a' dèiligeadh le bhanaichean ann an dòigh choimearsalta agus a' cothromachadh an cuideam.
Ach tha iad a-nis air an inntinn atharrachadh an dèidh mar chaidh innse dhaibh mun droch bhuaidh a tha seo a' toirt air gnìomhachas an iasgaich.
"Bha seo a' ciallachadh, rud a bha a' cosg beagan is £40 airson Caol na Hearadh, gun robh e a-nis a' dol gu còrr air £200," thuirt Rùnaire Chomann Iasgairean nan Eilean Siar, Donnchadh MacAonghais.
"An fheadhainn à Barraigh a bha a' tighinn a-nuas a dh'iarraidh maoraich airson a ghiollachd an Steòrnabhagh, bha sin a' ciallachadh gun robh e a' dol bho thimcheall air £80 gu còrr air £400.
"Call mòr"
"Bha sinn a' faicinn nach b' urrainn dha na gnìomhachasan sin cumail a' dol, agus gun deadh am maorach a tha sin gu Tìr Mòr, agus bha call mòr do dh'eaconamaidh Uibhist agus Bharraigh.
"Tha seo a' ciallachadh gu bheil na h-aon riaghailtean a-nis eadar na h-eileanan 's a tha gu Tìr Mòr.
"Ma tha maorach beò a' dol eadar na h-eileanan, no gu Tìr Mòr, tha aon phàirt den t-slighe an asgaidh.
"Tha sin a' dol a dhèanamh atharrachaidh mhòir dhan ghnìomhachas, ri linn, mura biodh seo air tachairt, agus na cosgaisean a' cumail an-àirde, bhiodh obraichean air an call ann an Uibhist 's am Barraigh," thuirt e.